الدجاج المحمر
تايجي مداقه بحال ديال الفرح
يلاه نقوقلو بسم الله الحبيبات
كنتمنى تعجبكوم الطريقة و لي جرابتها تقول لينا كيف طلعات ليها
انا دجاجي كنقيه بلمحة مزيان كنحيد منه كاع الشحمة
من بعد نغسلو ونحطو بانيو ونزيد عليه شوية تاع الملح وعصير الحامض ونخاليه شي نصف ساعة
ومن بعد نغسلو مزيان ونقطرو ونعصر عليه شوية تاع الحامض مع قطرات الخل ونخاليه ينشف ونحطو فكونجيلاطور
واحد السر صغيور :
كلما خليتي الدجاج ينشف كلما تيجي بنين
تنوجد الشرمولة و من الاحسن يبات فيها حتى لصباح عاد يطيب كيجي بنين لكن الا كنت مزروبة راه ساعة تكفي
المهم مقادير الشرمولة :
كنشد بصيلة صغيورة تنقطعها و تمزيد ونزيد عليها ربيطة ديال المعدنوس و الثومة و قلب حامضة مصيرة بعدما تنحيد منها الجلوف
تنزيد شوية ديال الماء باش يطحن لي فمولينيكس
من بعد كنحط هاد الخليط فشي بانيو و تنزيد عليه
الخرقوم ملون
معيلة صغيرة ديال قعقلة وبسيبيسة
شوية ديال السمن
ملحة حسب الذوق
يمكن ليك تزيدي كنور لكن ديال البقري
شوية دبال الماء ديال الحامض مصير
لبزار
سكنجبير
كنخلط كولشي مزيااااااااااااااااااااااااااان
و تنبدا نغطس الدجاج فالشرمولة
متنسايش بين لفخيضات ديال الدجاجة
من بعد تتعقدي رجليلاتها بالخيط
و تخليهم فالثلاجة حتى لصباح
الطريقة دجاج محمر
فاش نبغي نطيبهوم كنديرهوم فكاميلة ونعفس على صدرهوم شوية او تقبي صدرها بالسفود ديال الشوى باش يدخل معاهم الطياب
تنزيد عليهوم شوية شوية من توايبل لي درت قبل وشوية تاع سمن وربعة تاع بصلات مشلطين مزيان
كتكبي فجنب الطاوة القليل من الماء
و كتزيدي شوية ديال الزيت (كتخلطي زيت العود مع الزيت العادية) من فوقهوم
كتزيدي الزعفران شعرة بعدما كتكوني سخنتيه وحكيتيه بيديك
كتغطي الطنجرة لكن كتخليها شوية منفسة باش ميطرطقش ليك الدجاج
كتخاليه حوالي نصف ساعة تقريبا على كريشو من بعد كتقلبيه غير بالمهل على ضهرو (بحال الا كديري ليه الماساج اصلا كلما فششتيه تيجي بنين )
متيحتاجش وقت طويل فالطياب خاصة الا كنت مبيتاه راقد
غير يطيب حيديه من الطنجرة
دابا خاصنا نوجدو القوينصات و الكبيدة :
1- كتاخدي لقوينصات و لكبيدات و لعنيقات
كتغسليهم مزيااااااااااااااااااااااااااان لانهم تيكونو زفرين
انا تنصلقهم فالماء لي تنزيد عليه ونص حامضة و قريصة من التوايبل
غير تيطيبو تنصقطرهم و نخليهم يساينو مصيرهم المشرمل ههههههه
2- كتاخدي المرقة لي طاب فيها الدجاج
كتدوزيها من السفاية باش كتتحك البصلة مزيااااااااااااااان
من بعد كترضيها للطنجرة
33- رمي فالطنجرة لقوينصات و لكبيدات و لعنيقات لي سبق ليك سلقتيهم بعدما يكونو تسقطرو من الماء مزيااااااااااااااان
كتخليهم يدغمرو على خاطرهم علة نار مهيلة
مرة مرة دوزي يديك فالطنجرة باش متحرقش ليك
*** تحمير الدجاج :
انا لانني عندي سوابق خايبة مع الزيت كندخله للفران لكن تندير ولحد الحيلة باش ميجيش ناشف و هي :
تناخد زبيدة
تنزيد عليها شوية ديال السمن
كنور ديال الدجاج
شوية ديال الزعفران
يمكن تزيدي شوية ديال السودانية غير لميزة كتبننه
تنخلطهم مزيان حتى كيوليو بحال لاكريم
و تندهن الدجاج بيه
غير خاصك ترضي البال راه دغيا تياخد اللون الذهبي
صافي ...
دابا تقدري تقدميه بالطريقة لي بغيتي
انا وليت كنزوقو بالسمان و الكنافة
فالحلقة المقبلة نوريكم الطريقة هههههه
المهم المذاق تيجي بنين بحال ديال العرس
و بالصحة و الراحة
من مطبخ:شهيواتي